“Opkomende projekte”

Maak jou gereed vir ’n reis terug in tyd met Hartsbriewe – ’n middag deurdrenk met nostalgie, warmte en die sagte fluisteringe van liefde in al sy gedaantes.

Laat die klanke van Coenraad Rall se klavier jou dra na vervloë oomblikke, terwyl Hannes van Wyk, geliefde TV-aanbieder en akteur, jou op reis neem met ’n keur van briewe wat soos geheime in ’n ou laai gebêre was.

Hierdie Hartsbriewe – soms snaaks, soms hartseer, altyd opreg – vertel van verlore liefdes, tydlose familieherinneringe en daardie eenvoudige, kosbare vreugdes van die lewe.

Hartsbriewe is ’n huldeblyk aan alles wat ons harte sag maak en ons drome lewendig hou. Jy kan uitsien na ‘n middag vol nostalgiese stories, ‘n bietjie humor, ’n traan of twee… en ’n warm gevoel wat nog lank sal bly ná die laaste woorde gespreek en note gespeel is.

Vertonings:

1 Okt                                                                                                 Potch – Aardklop Kunstefees 

2 Okt                                                                                                 Potch – Aardklop Kunstefees 

7 Okt                                                                                                 Stellenbosch Woordfees 

10 Okt                                                                                              Stellenbosch Woordfees  

Moet dit nie misloop nie

Hulle het ’n goeie show beplan, regtig, hulle’t gehoop om selfs vir ‘n prys genomineer te word. Maar die ou man vergeet heeltyd sy invalle en arme Magda moet net vure doodslaan. Eerlikwaar, die begin is bra flou, maar die middel is darem … oukei-erig. En die einde sal jou met stof tot nadenke los. Hopelik. Magda en Erhard gesels oor die kuns van die lewe, die fases van oudword; die jare wat ons in prentjies kan opsom en hoe ons met die verfpot in die hand staan. Tot die kwas opdroog.

Vertonings:

28 Augustus                                                                                  Hartbeespoort – NHSV Schoemansville

16 Sept                                                                                             Pretoria – Die Blou Hond 

17 Sept                                                                                             Kathu – Hoërskool Kathu 

18 Sept                                                                                             Kuruman – Hoërskool Kalahari 

19 Sept                                                                                             Upington – Laerskool Oranje Noord 

30 Sept                                                                                             Potch – Aardklop 

11 Okt                                                                                              Kemptonpark – Emperor’s Palce 

Sielskos

Sy spontaniteit, spitsvondingheid en sjarme maak van Hannes van Wyk ‘n baie gewilde en geliefde persoon en by damesoggende kan jy nie vir ‘n beter en meer inspirerende spreker vra nie.

In sy aanbieding en motiveringspraatjie “SIELSKOS” laat val hy die kollig op die vroue wat sy lewe aangeraak het, of wat hom aangryp en inspireer. Dit is ‘n gesprek vol deernis, humor en wysheid wat enige vrou se hart sal verbly. Hy raak aan mense se harte en emosies, maar sorg ook vir lekker lag en humor. 

Dit is ‘n praatjie vir elke lid van die gesin en elkeen wat ‘n ma het, gehad het of selfs ‘n ma is, mans en vroue, moet hierdie boodskap hoor. 

Vertonings:

30 Augustus                                                                                  Lambertsbaai – Bokkoms & Blomme Fees 

26 Sept                                                                                             Bloemfontein – A & E Events 

31 Okt                                                                                              Laingsburg – Karoo Landbou fees